Eiginleg dagskrá ráðstefnunar hófst í dag í grenjandi rigningu.  Tuttugu og sex ráðstefnugestir, frá níu þjóðlöndum, héldu á vit ævintýranna undir styrkri leiðsögn Hauks Jóhannessonar, jarðfræðings, en Haukur hefur víðtæka þekkingu á eldfjallafræði og hefur verið höfundur eða meðhöfundur af flestum þeim vísindagreinum sem snúa að almennri jarðfræði Íslands.  Haldið var á Reykjanesið þar sem Leiðarendi var skoðaður og svamlað í Bláalóninu.  Haukur fræði okkur um hraun á nútíma auk þess að glefsa í íslenska menningu og listir.  Í máli Hauks kom fram að eldvirkni Reykjanesskagans virðist fylgja 1000 ára reglu, en seinasta meiriháttar gosvirknin á Reykjanesinu var einmitt í kringum landnám.  Það styttist því óðum í nýtt gostímabil, þ.e.a.s ef reglunni er fylgt.  Öll hraun á Reykjanesinu eru frá nútíma, eða yngri en u.þ.b. 12þús. ár og yngstu hraunin eru um 800 ára gömul.

Á morgun, miðvikudag, verður fyrri fyrirlestrardagur ráðstefnunar.  Þar mun Kristján Sæmundsson, jarðfræðingur, vera með inngang að jarðfræði Íslands.  William Halliday mun velta fyrir sér hvað hraunhellir er, Julia James fjallar um gæði lofts í hellum, Ruth Lawrence tekur fyrir ferðamennsku og hella, Árni B. Stefánsson ætlar að segja frá friðunarmálum hella og seinasti fyrirlesturinn fyrir hádegismat verður á vegum Chris Woods, en hann ætlar að fjalla um eldfjallafræðilega landmótun og hraunhella.  Eftir hádegismat mun Tsutomu Honda segja frá rannsóknum á hraunrennsli, John J. Pint tekur fyrir hella í Saudi Arabíu í tveimur fyrirlestrum, Ken Grimes fjallar um hraunhellarannsóknir í Ástralíu, Árni B. Stefánsson mun stíga aftur á stokk og fjalla um Hallmundarhraun, sem og Chris Wood.  Eftir kaffihlé mun Tsutomu Honda fylgja í fótspor Árna og flytja sinn annan fyrirlestur en nú um myndun hraunstráa, Francesco Petralia fer yfir á aðrar slóðir og fjallar um hraunrásir neðansjávar og þessum fyrsta fyrirlestrardegi líkur með erindi Kens Grimes um helli í berggangi.