Nú um helgina fóru Jakob og James í hellaleiðangur á Snæfellsnesið.  Tilgangurinn var að leita að hellum í Purkhólahrauninu.

Við byrjuðum á að leita ofan við veg og teljum að sá hluti hraunsins sé fullkannaður.  Til viðbótar við það sem áður hefur fundist fundum við 3 komplexa af yfirborðsrásum.  Þetta er allt stuttar, þröngar og lágar rásir sem liggja saman og sundur út frá eldvarpinu norðan megin í gígnum.  Engar stóra hella fundum við hér.  Áður en við kvöddum efri hluta hraunins réðust við í það vandasama verk að hreinsa hraunrásina sem liggur frá eldvarpinu vestan megin við Purkhólinn.  Við rudd okkur niður á um 25m dýpi aðeins til að komast að því að rásin endar í þrengslum.  Þá vitið þið það. 

Neðan við vegin leituðum við á litlu svæði sem afmarkast af Purkhólnum og hrauninu sem rennur niður í Einarslón.  Engir hellar fundust og varla nokkrar vísbendingar um hella á þessu svæði.

Mikil forvitni varð til þess að við löbbuðum þvert yfir hraunið, um 2km rúnt, niður að Sauðahelli, en hann liggur meðfram ströndinni.  Við skriðum hann sundur og saman til að komast að því að hann inniheldur 4 anga, sem allir lokast í þrengslum eftir 5-15m.  Sauðahellir hefur verið notaður af útgerðarmönnum hér á árum áður og mátti sjá vegghleðslur við opið og einhverjar framkvæmdir hafa verið við gólfið því svo virtist sem klappir hafi verið lagðar á það til að gera það sléttara.  Á leiðinni niður að Sauðahelli kom ýmislegt fyrir sjónir.

Til að byrja með þá bendir margt til að Sauðahellir sé ekki í Purkhólahrauni.  Á hraunakorti sem ég hef gæti hér verið á ferð svæði sem nefnist Hraunhólar, og verður það kannað nánar.  Þetta nýrra hraun sker sig mjög frá Purkhólahrauninu, hvað varðar hellamyndanir og yfirborð.  Þetta hraun er allt útsteypt í yfirborðsrásum og á leiðinni að Sauðahelli skráði ég niður 8stk.  Þessir hellar eru flestir lágir, og margir hverjir ókannaðir.  Fyrir utan hraunrásirnar sjálfar sáum við líka glæsilegar hraunbólur.  Þetta hraun er langt frá því að vera fullkannað og vel má vera að einhverstaðar leynist sá stóri.  Í fljótu bragði gat ég ekki séð nein augljós upptök, þ.e. gíg eða eldvarp.  Nokkur þrýstingur virðist hafa verið undir hálf-kristallaðri skorpunni því út um allt má sjá uppblásin svæði með hraunrásum sem hafa gubbast upp á yfirborðið og runnið burt sem litlar hraunrásir.  Í nánustu framtíð verður þetta svæði skoðað með það fyrir augum að tengja það rennsli Purkhólahraunsins.

Á leiðinni upp í bíl GPS mældum við 2 hella sem við erum nokkuð vissir um að séu þegar þekktir.

Á sunnudeginum löbbuðum við aðeins um Búðahraun.  Ég veit ekki hvað þið hafið mikið skoðað þetta hraun, en við gefum því ekki háa hellaeinkunn.  Við löbbuðum frá Miðhúsum, vestan við gíginn, í átt að gígnum.  Svæðið er allt fullt af hrundum hellum, og fundum við ekki eitt op í grjóthrúgunum.  Sjálfur fer ég ekki aftur á þetta svæði nema góðar vísbendingar liggi fyrir um að hellar séu á svæðinu.  Vel kann að vera að svæðið umhverfis gíginn og austan við hann sé betra og væri gaman að fá fréttar af því ef svo er.  Þó fundum við einn helli.  Þrýstihryggur hefur myndað um 30m langt holrými sem um þessar myndir er vel notað af sauðféi þeirra Snæfellsnesinga.  Þessi hellir er við göngugötuna sem liggur þvert yfir hraunið.

Svona fór um sjóferð þá.

Með hellakveðju, Jakob og James.