Hellagallinn var rifinn úr hillunni, hent ofan í bakpoka, og á eftir komu karbúttækið og mæligræjur.  Stefnan var set á Bálkahelli í Krýsuvík, en hann átti að kortleggja.  James Begley var sá eini sem sá sér fært að koma með í þennan leiðangur og því héldum við tveir á Rangernum eftir nýhefluðum veginum framhjá Kleifarvatni og niður í Krýsuvík.

Þegar við vorum að taka okkur til hittum við Ómar en FERLIR var einmitt að fara í gönguferð um Selvogsheiði (sjá hér að neðan).  Til að gera langasögu stutta þá tókst okkur að slá máli á hellinn.  Í þessari lotu kortlögum við aðeins neðsta opið.  Hellirinn er nánast flatur, eða með um 1-2° halla og mæld lengd var um 220m.

Eftir er að klára kortið er hér að neðan eru gögnin birt hrá, eins og þau koma úr úr tölvuforritinu Compass.

En þetta var ekki það eina sem við James gerðum í Krýsuvíkuhrauni.  Okkur reiknaðist til að við ættum um tvo og hálfan tíma í myrkur og tókum því poka okkar og hafurtask og röltum niður að sjó með það að markmiði að finna fleiri hella.  Undirritaður hefur ekki séð hraunakort af Krýsuvíkurhrauninu en ljóst er að mjög margir hraunstraumar eru settir undir örnefnið Krýsuvíkurhraun.  Við löbbuðum sem leið lá, beint frá Bálkahelli, niður að sjó og fundum ekki neitt, ekki einu sinni eitt op.  Hraunið vestan við Bálkahelli, og gönguleið okkar niður að sjó, er mjög hrjúft aa-hraun og mjög erfitt yfirferðar.  Við gerðum enga tilraun til að kanna það hraun nánar.  Þess í stað könnuðum við hraunstraumana austan við Bálkahelli, allt frá strönd og upp að vegi.  Hér fóru hlutirnar að gerast.  Við höfðum ekki gengið lengi þegar við komum að tveimur opum, ekki mjög stórum en opum samt.  Létt skönnun á opunum leiddi í ljós að hér var um helli að ræða.  Til að gera langa sögu stutta þá fundum við ein sjö svæði með hellum.  Mörg þessa svæði hafa fleiri en eitt op og all flest eru mjög álitleg hellafræðilega séð.  Þeir sem eru komir með bjórbumbu og eru veikir í baki ættu ekki að leggja leið sína í þessa hella því flestir þeirra eru lágir og krefjast notkunar hnéhlífa.  Hér að neðan er GPS-punktar af þessum svæðum og smá lýsing á þeim.  Öll gögnin eru á WGS84 datum.

N 63° 50.579′ og V 021° 57.007′

Neðsta svæðið.  Tvö op, annað er þröngt og hrjúft, en hitt meira vænlegt.

N 63° 50.645′ og V 021° 57.144′

Átta inngangar fundust, margir litlir, en kerfið sem slíkt er mjög álitlegt.

N 63° 50.839′ og V 021° 57.380′

Einn inngangur.

N 63° 50.859′ og V 021° 57.350′

Lítið op og alveg ókannað.

N 63° 50.803′ og V 021° 57.444′

Einn inngangur.

N 63° 50.902′ og V 021° 57.557′

A.m.k. 5 inngangar.  Margir mjög álitlegir hellar.

N 63° 50.995′ og V 021° 57.491′

Lítið op, alveg ókannað, en á svæðinu sáust margar yfirborðsrásir sem gætu legið eitthvað inn.

Jakob Þ. Guðbjartsson